等足三年！李亞男王祖藍晒超聲波照宣布有喜

造人三年終成功！藝人王祖藍及太太李亞男晒超聲波相報喜，宣布有喜。李亞男在社交網上載超聲波照，又加上「Love you」及心心圖案，明顯心情興奮，並寫道：「今天是我們拍拖9周年紀念日? 很興奮感恩可以在這個特別的日子 宣布我和祖藍將迎接一個新生命嘅來臨 ? so blessed to have a new life in our family ❤Happy 9th anniversary !」

叫人開盤買BB高度似邊個

對於結婚三年多終榮升爹哋，祖藍笑謂：「首先好感恩啦，可以喺拍拖九周年紀念日去宣布呢件事，我哋拍拖嗰時係2009年，咁啱9年後有個小朋友，咁希望所有嘢都可以長長久久啦。亦都好感謝上帝，幫我哋安排晒所有嘢都喺計劃入面進行，之前應承過Leanne（李亞男）搬出嚟二人世界之後，過兩年左右先有小朋友，依家真係實現到，真係好感恩。」祖藍又笑謂其公司十分旺丁：「我哋先後有兩個員工有咗，依家計埋我老婆就三個人，咁如果想生B，入嚟我公司做啦！」祖藍更叮囑大家幫忙「睇住」老婆，盡顯「暖藍」本色：「做媽媽真係好辛苦，佢為BB付出咗好多，又睇書啦、又改變自己飲食習慣啦，又好緊張去預備好多嘢啦，所以麻煩大家照顧吓佢。」祖藍亦不忘搞笑本色謂：「大家最近除咗睇法國定克羅地亞贏呢？我建議開多個盤，就係究意將來BB嘅高度係會似我定似阿媽呢？相信都幾啱用嚟打牙骹戰。」

為BB戒咖啡

向來十分喜歡小朋友的李亞男則表示：「好開心終於做媽媽喇，第一時間知道嗰陣真係好驚喜，同埋有啲唔敢相信。因為我哋雖然係Plan今年做爹哋媽咪，但冇諗過咁快就實現到，真係好感恩。其實仔定女我都冇所謂，因為我都會好鍾意。最緊要係BB嘅成長過程夠健康，同埋佢嘅成長夠開心快樂。」李亞男又謂已向「Amazing Esther」一眾好姊妹分享喜悅：「我有向Linda（鍾嘉欣）同宋熙年取經，問定佢哋有咩嘢唔食得，同埋可唔可以做運動，真係好多好多問題想問，始終自己冇經驗。」她又謂為了BB着想，已對十分喜歡的食物盡量Say no：「我食少咗好多甜品，同埋飲少咗好多咖啡，我以前可以一日飲幾杯！雖然呢啲都只係好小嘅事，但已令我體會到做媽媽係需要付出好多嘅愛。」李亞男又承諾現階段會好好Take care自己，多點休息，果然為升呢媽咪做足準備。

好友張繼聰、黃心穎、胡杏兒紛紛送上祝福！而身在法國的好姊妹岑麗香透過過短訊回覆東網說：「我比大家早少少知，當然戥Leanne同祖藍好開心，希望佢佗B嘅時候唔會好辛苦，同埋希望BB會好得意啦。」

----------------------------

東網巨星開咗ig喇，大家快啲follow啦！

　https://bit.ly/2JjSVcr