寵物議題掀風波！唐貝詩「盆景貓」論最爆

寵物向來係人類嘅好朋友，圈中有唔少藝人喺處理有關寵物議題嘅時候，都試過因為一啲言論及行為而引發網民嘅抨擊，惹起軒然大波。

唐貝詩

寇鴻萍大女唐貝詩（Lydia）喺2010年5月於社交網上載一張貓貓被放入牛奶樽嘅殘忍虐貓圖片，並留言：「我今天訂購了一隻盆景貓，明天便有貨，Yeah！」即畀網民以及一眾愛貓藝人圍插，就連其契媽鄭裕玲亦以英文鬧「冇腦」。

陳柏宇

歌手陳柏宇（Jason）今年4月自爆家中嘅鬆獅狗同老虎狗打交問題嚴重，加上太太符曉薇正佗B，所以最壞打算或要將狗狗交由朋友照顧，不過言論一出即被網民怒轟「棄養」，插爆要B唔要狗，事後Jason亦立即澄清冇諗過棄養，並指會將狗狗交畀訓練員訓練。

何雁詩

歌手何雁詩（Stephanie）及鄭俊弘（Fred）公開認愛後，去年12月有指Stephanie接受唔到Fred同前度所養嘅愛犬Riley，而將Riley棄養，更有指Riley被迫戴上具危險性嘅狼牙圈狗鏈，即引發「虐狗」疑雲。事後，Stephanie指冇送走Riley，只係安置喺男方屋企，並承認Fred訓練狗狗時會為佢戴上刺激狗鏈，但強調不具危險性。