同陸漢洋十月結婚　苟芸慧原來有咗「BB」

35歲苟芸慧（苟姑娘）將喺10月同賽車手男友陸漢洋結婚，雖然婚禮仲有約3個月，但喺7月11日時，男友為苟姑娘慶祝最後一個單身生日，嗰次女神已經做埋「陸太」，原來仲有埋「BB」添。

嗰日陸漢洋由早到晚為未婚妻炮製生日驚喜，先送咗一個苟姑娘好鍾意嘅篋上門，篋上面印有「Mrs CKL」，即係「你的名字，我的姓氏」，苟姑娘英文名「Christine Kuo」縮寫，加男友姓氏「Lok」，當女友揭開禮物時，仲大叫：「嘩，陸太呀！」苟姑娘點會唔冧到患糖尿病呢？

而生日「甜品」陸續有來，喺晚上佢哋過二人世界，除例牌嘅浪漫燭光晚餐，仲有「甜心生日蛋糕」，原來個粉藍色棉花糖蛋糕內有「玄機」，「糕短情長」皆因陸漢洋曾講過覺得女友係「佢嘅棉花糖」、「棉花糖」指「豬豬」同「BB」，代表屬豬同皮膚似BB嘅苟姑娘，呢個唔識講嘢嘅蛋糕就暗示咗男友嘅千言萬語。

唔急造人

問到未來老公成日放冧招，會否擔心男友就sweet，將來做老公就weak無能為力？苟姑娘表示：「相信佢，相信愛情係唔會變質，會stay sweet，同埋佢常常話會以劉青雲做榜樣，所以好放心。（就嚟做陸太，時間愈近愈緊張？）相反，反而婚禮愈近，心情愈平靜，可能做多咗Facial、spa treatments。（十月婚禮的安排如何？）主要係William計劃，會有驚喜，同埋會係我希望嘅戶外婚禮。（婚後造人計劃？）我哋都傾咗計劃三年後，想要過住兩人世界先。」提到婚後居住的地點，她表示短期不會返加拿大居住，大家會以工作為重。

另外，苟姑娘係虔誠基督教徒，佢想喺婚前同男友上婚前輔導班，初時男友覺得唔太需要，但女友好鬼堅持，男友又唔捨得逆女友意而屈服咗，另外二人雖然好鍾意細路，但苟姑娘婚後想過二人世界先，佢自己又想喺事業再衝刺，覺得可能有一日自己比男友仲「疊水」，所以放聲唔急造人，況且男友喺佢眼中已經係佢嘅「BB」，要好好照顧呢個大「仔」咁話。