搭小巴險受傷!車淑梅斥梯級設計不妥

2018年07月14日 13:53
東網電視
更多新聞短片
車淑梅直斥19座小巴梯級設計有問題!

電台節目主持人車淑梅喺社交網透露遇上「小巴驚魂」,不過佢唔係遇「針插座位」,而係搭嗰部19座小巴,喺車門上落位度,有一級原意係方便長者上落嘅梯級,但因為呢個梯級係斜梯型,面積唔大唔細,所以可能成為一個上落客嘅「中伏位」,而淑梅嗰日差啲因為呢個梯級而跌親,佢留言話:「差點被這小樓梯摔倒,大家上落車時一定要小心啊。」

該改良設計

淑梅接受東網訪問時表示多謝大家關心:「我冇事,但落車時屈一屈、扭一扭,要企喺度成分鐘先夠膽再行,因為係痛囉。其實嗰一級上車時係好明顯嘅,因為一定會睇住嚟行,不過落車時好多人跟尾落,你一定會想行快啲,唔好阻住人,但嗰日我一落,冇耷低個頭,平時16座(小巴)一落就落,但(19座小巴)嗰一級又匿埋側邊位,你又睇佢唔到,於是乎我半隻腳踩落小級,再成隻腳跣咗落去大級嗰度,差啲『燉』落去,好在側邊有啲人、又有扶手,我立即捉住,否則真係好醜怪同會受傷。我希望有關方面快啲糾正,係錯咗(個設計)!曾經試過有人受傷,點解仲唔改善?唔想再有人受傷囉,可唔可以將黃色嗰個梯級延伸到有成個樓梯級,變為有三級樓梯,因為兩蚊車資,好多長者都會選擇搭嚟周圍去嘛。」