又唱又演冇NG　黃曉明做王菲真人騷首集嘉賓

天后王菲得香港著名音樂人梁翹柏為佢度身訂造內地真人騷《幻樂之城》，將會喺本月20日播出，有傳佢以3億人民幣天價接呢個job做「體驗官」外，有份演出嘅嘉賓多如天上繁星，除咗有確實咗嘅容祖兒外，據知仲有古巨基、張智霖、莫文蔚，內地代表有黃曉明同易烊千璽共48位。

原來首集任「唱演人」嘅嘉賓黃曉明演技了得外，仲好鍾意唱歌仔，喺節目度「曉明王子」同每集嘅「唱演人」一樣，以歌曲演繹一段8分鐘嘅微電影，喺現場觀眾「監察」下，又唱又演仲要冇得NG，所以每次都係集歌影劇於一身嘅大挑戰，雖然眾參加者要簽保密協議唔可以爆料，但身經百戰嘅容祖兒，亦曾喺社交網吐心聲指壓力大：「今日完成了一個工作，非常唔簡單，有時做嘢最重要不是結果，最重要是過程和得到的感受與經驗。」不過暫時落實的港星只有容祖兒，屆時亦會演音樂微電影。