攞正牌捱夜　鄧鉅明Call三百幾人陪睇波

太子珠寶鐘錶集團主席鄧鉅明及太太鄧宣宏雁（Emily）出席《我愛世界盃 瞬間看入球晚宴》，與朋友及客戶齊齊欣賞今晚法國對克羅地亞呢場世界盃冠軍賽，鄧鉅明話12年前都有搞過睇世界盃嘅活動，因為時間唔許可而冇再搞：「之前過去幾屆嘅時間唔配合，太夜成兩點鐘開波點搞呀，11點都抆抆哋，今年就繼續搞啦，一嚟有個機會可以請好朋友、客戶同埋公司管理層同事一齊開心下。（下次會唔會唔會隔咁耐先搞？）要睇下賽事，睇下個時間。」

老婆籌備咗兩個月

鄧鉅明話今次請咗三百幾人，用咗兩個月時間籌備：「都係我太太諗起，話好多朋友好耐冇見，咁我諗諗下，不如搞個世界盃Party啦，搞番12年前我哋做過嘅嘢，之後睇番啲賽事時間，見到11點覺得許可。（個口號係咪你諗？）我老婆。」

問籌備呢個派對有何困難？Emily話：「咁又冇乜難度，因為啲朋友一叫就到，好多謝佢哋嚟，不過因為我哋太忙，所以畀佢哋自由發揮，今日食自助餐，希望大家玩得開心啲。」

最鐘意巴西尼馬

講到今日鄧鉅明攞正牌可以捱夜睇波，Emily話不嬲都好放心：「佢從來都唔睇波，咁多年都係第二次，第一次就係十幾年前。」鄧鉅明即「賣口乖」大讚太太：「佢好遷就我，咁夜瞓通常唔得㗎！」

講到今屆世界盃，鄧鉅明最鍾意睇英格蘭對比利時嘅賽事，雖然英格蘭輸咗，但佢話能夠打入四強已經好叻。問最鐘意邊個球員？鄧鉅明話最鐘意巴西嘅尼馬。