【億萬身家之謎】20歲Kylie Jenner年賺13億
20180717
東網電視
更多新聞短片
20歲就已經可以年賺13億港元，堅巴閉！
美國著名真人騷Kardashians家族絕對係全美吸金力最勁嘅家庭，其中以家族中年紀最細、年僅20歲嘅Kylie Jenner「吸金力」最驚人，年紀輕輕嘅佢已經成為億萬富婆！
Kylie Jenner除咗早排以70.6億港元身家，打入國際財經雜誌《福布斯》（Forbes）「美國60位最富有白手興家女性」排行榜嘅第27位之外，日前佢亦以接近13億港元嘅一年收入高踞《福布斯》嘅「年度百大最高收入娛樂家」排行榜第3位，擊敗一眾女星包括真人騷女王家姐Kim Kardashian等而成為眾女星收入之冠，認真巴閉！到底樣靚身材正嘅Kylie又有幾把炮成為「吸金女王」？據統計佢嘅自家化妝品品牌Kylie Cosmetics by Kylie Jenner係佢主要收入來源。雖然佢成為「吸金女王」 ，但亦同時惹來大批網民批評，質疑佢憑咩有呢個title？由於佢吸金力驚人，連帶擔任其經理人嘅母親Kris Jenner亦賺到笑，憑住抽子女10%佣金，今年就以3億港元首次打入「百大排行榜」第84位。
正所謂「樹大招風」，入行11年嘅Kylie多年來亦負面新聞多多。除咗一直被傳整容隆唇、隆胸「變樣」之外，其化妝品牌3年前推出初期亦因製作過程出問題而被大批顧客投訴，指打開包裝後聞到強烈嘅化學品與臭膠味，令人產生強烈頭痛與身體不適，及後更要回收有問題批次。而Kylie亦曾遇人不淑遇上「渣男」，3年前佢與男歌手Tyga拍拖，點知Tyga卻被佢揭發與變性人四仔女星Mia Isabella偷食而畀佢怒飛。後來，Kylie與另一「渣男」歌手Travis Scott拍拖，男方亦被傳出「一腳踏十船」同時與10名女性交往。Kylie最終更因為被佢搞大個肚而被逼選擇啞忍，認真可憐！
----------------------------
東網巨星開咗ig喇，大家快啲follow啦！