【畢安戰報】傳安祖蓮娜為分畢佬身家爆大鑊

又係佢哋呀！荷里活影星畢彼特（Brad Pitt）兩年前與安祖蓮娜祖莉（Angelina Jolie）爆離婚，一直因爭仔女撫養權而未完成離婚手續，雙方本身低調處理官司，不過女方近期突然高調爆料，指責畢佬未有畀贍養費，各執一詞透過律師「開火」，而日前更有陰謀論爆出安祖蓮娜原來因為想分畢佬身家而搞事！

上回講到畢佬向法庭入紙反擊，表示近兩年曾借800萬美元（約6280萬港元）以及支付130萬美元（約1020萬港元）贍養費予安祖蓮娜，女方就反擊畢佬部分金錢只係「借出」，未盡做老竇嘅責任。

近日有指安祖蓮娜之前一直都未有就贍養費投訴，係因為去到近幾個星期先開始着緊離婚後嘅錢銀分配問題，據悉佢與畢佬嘅身家分別為1.6億美元（約12.5億港元）及2.4億美元（約18.8億港元），身家比較少嘅安祖蓮娜，如果有得平分埋男方身家當然着數啦，不過，佢哋冇簽婚前協議，即係話，安祖蓮娜於法例上，只可以平分二人結婚後，雙方所賺收入嘅一半！雖然佢哋早於2004年拍拖，但去到2014年先結婚，前年就申請離婚，即係僅僅可以分大家兩年左右嘅收入。

據悉安祖蓮娜要分埋畢佬於2004年至2014年嘅收入，一定要證明到雙方有就此作出過協議，有傳女方就打算入紙表示佢哋拍拖時真係曾經承諾講過會咁分身家。至於畢佬一方嘅知情人士就覺得安祖蓮娜呢個行徑得啖笑，因為佢哋兩人本身都咁有錢，呢個「承諾」聽落完全多餘，而且根本從來冇發生過。