TVB專出特技人 徐子珊「最後無事」!

2018年08月11日 22:00
東網電視
更多新聞短片
真係好多特技人!

由藝人譚俊彥同朱晨麗等主演嘅無綫劇集《特技人》熱播當中,劇入面有大量高難度動作,朱晨麗飾演嘅「May豬」除咗身手敏捷之外,fit爆身材更加成為話題之一,由佢做特技人角色絕對適合不過!其實往年TVB亦有好多劇集出現過「特技人」,佢哋話題度同樣高,包括關禮傑跳天台,謝天華單手攀岩,徐子珊遇爆炸同中槍都唔死等等,呢日See See TVB Facebook專頁就上載一條短片,令大家可以重溫呢啲經典畫面!

關禮傑喺2014年嘅劇集《叛逃》入面係一個訓練警員嘅教官,所以身手都有番咁上下。其中一集關禮傑要同警員進行跨樓跳躍特訓,佢首先助跑衝上天台邊,然後輕鬆一跳,咁就凌空飛過相隔成條馬路咁闊嘅對面天台,睇到大家O晒嘴,連呢種場面都應付到,關禮傑仲唔係出色嘅「特技人」?

除咗關禮傑之外,謝天華嘅身手亦不容忽視,佢喺2013年嘅劇集《神鎗狙擊》入面飾演一個身手好好嘅神槍手,有一幕佢仲挑戰人體極限,竟然唔扣安全帶攀岩,期間佢電話響,天華更加可以單手捉住岩石,然後好輕鬆咁用另一隻手接電話兼傾電話,成個過程輕鬆、自在、寫意,呢一幕可以堪稱史上最神乎其技嘅電視畫面之一,令天華成為觀眾心目中經典嘅「特技人」。

女子組方面,有「不死珊」之稱嘅徐子珊絕對係表表者,當年子珊喺劇集《潛行狙擊》同《神鎗狙擊》入面,分別經歷大爆炸同心口中槍,但生命力頑強嘅佢依然係「最後無事」,令網民嘖嘖稱奇,難怪獲得「不死珊」美譽,亦係暫時電視史上最有鬥志嘅女「特技人」,依家《特技人》只係播咗一個星期,網民都好期待譚俊彥同朱晨麗呢兩位「特技人」可以青出於藍!

網民有話兒:

X乜:最後一個真係特技嘅人
TXXn AlXXn:四集了,除了找替人認jj for jump jump 那一段有點智慧之外,其他劇情都好hea……
Cxxdy Jxx:好厲害哈哈哈哈
Lxxx Gxx:現實中有咩人可以咁做?