老夫少妻點相處？專家何慕詩話最緊要...

陳凱琳與鄭嘉穎年齡相差22年，其實近年來社會都有不少「老夫少妻」的例子。專業性治療師及兩性關係輔導員何慕詩，表示一般老夫少妻都會隨着相處時間漸長，而發現對方與自己的習性截然不同：「通常一開始，女嘅會覺得男嘅有人生經驗、成熟穩重、事業有成、能夠保護自己；男嘅會覺得女嘅有青春有活力，同佢一齊會有回春嘅感覺。但當時間耐咗，所有優點都習慣咗嘅時候，女方開始會嫌男方太保守冇新意冇刺激，成日以『為自己好』嘅名義管住晒；男方則會覺得女方太幼稚唔識諗，唔成熟唔識照顧自己，花太多時間打扮唔實際。」

問到如何磨合及維繫夫妻關係，何慕詩建議雙方應作自我檢討，反思這段關係的得着，學懂珍惜感恩，並應多作心靈上的溝通，讓對方明白自己的所思所想，她續說：「要維繫就一定要體諒，欣賞大家嘅不同之處，同時吸取對方嘅優點一齊進步。」並指男女雙方均需包容，接受大家的不完美。提到「老夫少妻」於生理上面對的問題，何慕詩指女方需要接受伴侶可能較自己更早離世，她說：「一般而言年紀較大嘅一方多會先離開人世，或相對會年老體弱多病，所以女方決定一齊前應先有呢個概念，要自問真心承受得起，照顧對方。」

至於問到閨房的注意事項，何慕詩指男女雙方體力及性需求不一，需互相配合：「女方要注意男方體力，不能過度縱欲，性愛應以享受為主，而並非目標為本（高潮）。男方若發覺自己力不從心，不要勉強，可以嘗試運用多啲創意，用不同方法滿足女方。」她又建議夫妻間多擁抱及親吻，讓大家感受到愛及安全感，並強調若有問題應向專業人士求助。