好早熟！黃芳雯囝囝畀美眉圍開心到跳舞

有唔少藝人都會趁假期同子女去旅行叉電，享受家庭樂﹗藝人黃芳雯（Paula）近日就帶同差唔多歲半大嘅囝囝潘朗天，一家三口去台灣玩，雖然今次唔係佢哋第一次去旅行，不過Paula就話係一個好大嘅挑戰：「因為之前出去都會有埋媽媽喺度，加上先生喺呢個Trip成程都病咗，所以同時要照顧大小潘生﹗而今次揀台灣係因為先生要去飲，兼喺當地佢有好多朋友，就去搵朋友聚會。」講到此行囝囝嘅「表現」，Paula笑話天天依舊精力旺盛，又唔願瞓覺，期間仲發生咗一件事令Paula哭笑不得︰「佢唔肯瞓咪帶佢落街，去咗酒店後面嗰間食古早味刨冰嘅小店，諗住邊食邊開吓Live同朋友傾偈，點知佢就突然間瞓着咗，真係激死我！要我自己一個食晒成嗰刨冰。」

不過笑料又點止一樣！Paula繼續大爆囝囝趣事︰「佢好鍾意音樂，一聽到就會跳舞，咁有一晚就喺信義區間米芝蓮餐廳食飯，原來間餐廳係喺啲Club（酒吧）嘅下面，出到嚟嗰門口就有好多台灣美眉排隊，同埋啲Club嘅音樂好大聲，啲美眉就圍住我個仔話好得意，之後我個仔就好開心咁跳舞，跳到連入面啲保安都走出嚟望住佢，真係好搞笑！」

另外，Paula又分享帶B去旅行嘅小Tips，首先就要選擇好啱親子去嘅國家，同埋又要注意飲食方面：「台灣同日本都係我嘅首選，因為有好多大型商場都有親子廁所，呢樣嘢好緊要，方便小朋友換片，甚至係餵奶，地方又乾淨企理。而台灣有個最大嘅優點係有好多親子餐廳，消費仲要係比香港平一半，選擇多元化，食材又會由農場直送，好新鮮。」

----------------------------

東網巨星開咗ig喇，大家快啲follow啦！

https://bit.ly/2JjSVcr