陳琪爆囡囡早熟猛嗌想生B:原來係想我…

2018年08月12日 13:53
東網電視
更多新聞短片
一屋都係小朋友,真係一秒都唔可以停落嚟!

藝人胡諾言(胡仔)與太太陳琪帶埋兩女及細仔,到主題樂園出席兒童舞蹈活動,胡仔笑言幸好囝囝好乖,沒有扭計,亦打算明年讓囝囝學埋跳舞:「跳舞冇分男仔女仔,最緊要佢哋跳紮紮,增強自信心。」問到兩個家姐平時可會叫細佬一齊玩公仔或煮飯仔?陳琪笑言:「有呀,大女細女有日同我講要生BB,仲話邊個生仔邊個生女,點知原來係想我買公仔。(有冇好驚突然啲囡話要生仔?)又冇,ok喎,因為依家好多小朋友話唔想生仔,但佢哋肯生,我好鼓勵,但梗係唔係依家啦,大個有呢個思想好ok。」

問到兩女可有幫手照顧細佬?胡仔表示:「有呀,特別細佬依家學嘢好快,例如一個生字apple,以前家姐學發音要用個幾兩個月,但細佬幾日就識,可能因為家姐每日教佢,好開心睇到佢哋相親相愛,雖然兩個女之間有時會妒忌,但好錫細佬。」陳琪就大呻3個小朋友好嘈:「喺架車好嘈,最慘係揸車時,我走唔甩。」胡仔表示:「依家佢哋啲聲浪愈嚟愈大,依家一個9歲、一個6歲,細佬都兩歲,所以加埋好嘈。」