谷祖琳收拾心情Ready出席盧凱彤喪禮

藝人谷祖琳帶同兩個囡囡到主題樂園出席兒童舞蹈活動，期間兩女在台上跳舞。她表示囡囡學了一年多跳舞，問到兩女平時可會難搞？她謂：「唔難搞，我哋會傾點樣教小朋友，但其實依家小朋友好聰明，唔係我哋教小朋友，係小朋友教番我哋，鍛鍊耐性，同埋好多問題佢哋問我哋唔識答，要搵番先識答，個女又會自己上網搵資料，所以生小朋友初時好多嘢擔心，但生完之後又好多點滴令我哋開心。」

另外，講到好友盧凱彤日前去世，她表示：「一聽到消息係接受唔到，我哋一班朋友都盡快收拾心情，身邊仲有好多人需要我哋陪住，大家都冇咩點問候，學林一峰講，我哋全部都喺度，喪禮都一定會去，但冇一個係會接受到。（會再加多啲活動教育情緒病？）一路都有。」