陳凱琳結婚 好姊妹陳嘉寶賴慰玲勁感動

2018年08月12日 20:08
東網電視
更多新聞短片
見到好姊妹出嫁,係感動嘅!

藝人陳凱琳(Grace)同鄭嘉穎今日喺峇里舉行婚禮,大批圈中好友飛到當地祝賀。其中Grace嘅好友陳嘉寶(Anjay)、林皓霆(Charles)同埋賴慰玲都有出席。佢哋接受東網電話訪問,Anjay指喺婚禮上一度感動落淚,並祝福一對新人:「今日好感動,成日都好開心。其實一見到Grace行教堂嘅一刻已經忍唔住係咁流眼淚,因為成個氣氛都好感動、好幸福。所以依家都一路戥佢哋幸福,一路繼續同佢哋慶祝,希望佢哋都繼續開開心心。」

至於Charles就透露一對新人全程面帶笑容,幸福滿瀉:「好開心可以見證到呢個moment,一對新人喺面上充滿住喜悅,而且今日都有幾個好賺人熱淚嘅感動位,所以覺得佢哋可以遇到對方真係好幸運,希望佢哋可以create一個新嘅chapter。」佢又指一對新人有安排旅遊巴到機場接送各位賓客,並笑言整個氣氛好似一個大型嘅旅行團。

有份同兩人合作劇集《殭》嘅賴慰玲,就話睇住兩人喊晒起誓,感動到全場人士:「佢哋海誓山盟最令我感動,好開心,真係好戥佢哋高興!」