遊新西蘭享天倫樂　區永權笑仔仔係哈比人

藝人區永權（Albert）向來愛錫兩個寶貝仔區靖嵐（Aidan）同區靖崋（Ambrose），近日佢哋一家四口齊齊去新西蘭旅行。Albert連日嚟喺社交網上載多張旅行相，佢哋最新一站去到「哈比人村」參觀，見兩個囝囝一嚟到呢個經典電影拍攝場地即表現興奮，Albert仲留言笑指身形細粒嘅囝囝係「哈比人」，佢話：「進入『哈比人』村之前，碰到幾個疑似哈比人，喺相片中你見到幾多個？」另外，佢哋亦有喺當地體驗策騎，囝囝表現仲非常淡定，認真犀利。