繼續放假喪玩！梁朝偉打算唔再拍戲？

影帝梁朝偉、唐嫣、蔡穎恩、導演馬楚成在銅鑼灣出席電影首映禮。梁朝偉接受訪問時表示香港已經是電影宣傳最後一站，隨後會繼續放假去玩，直到一月為另一新片開工，他說：「繼續去玩，我做好多運動，好似帆船、爬山、滑水、風帆、衝浪。（最叻係邊樣？）樣樣都唔叻，只係貪玩，之前拍電影學彈琴，依家仲愛上咗彈琴，其實彈琴唔係彈畀人聽，係彈畀自己聽，依家有跟老師學，上午去做運動，下午就學琴、睇書， 彈琴係好長久嘅興趣，玩到年紀好大都得。（唔夠時間玩？）係呀，所以咪唔拍戲囉，哈哈。（有冇話畀太太劉嘉玲聽唔拍戲？）我話咗畀佢聽好多次，佢話最緊要我開心，其實去到呢個階段係隨心，想拍戲就拍戲，想做乜就做乜。我都鍾意拍戲，撞到啱想拍嘅先拍，唔係就繼續玩囉。最開心係呢個階段，我拍咗36年戲一路衝，年輕損失咗好多陪屋企人嘅時間，依家要陪多啲媽媽、太太、細妹、外母，想留多啲時間屋企人，做多啲鍾意做嘅嘢。」

壓力大磨牙

拍戲多年的梁朝偉因對自己要求高，一開工就感到壓力，他說：「我一返工就好大壓力，之前睇牙醫先知道我有磨石習慣，牙醫仲做咗個牙套畀我，冇拍戲就冇磨牙喎，太緊張，想做到最好。（轉咗嘉玲做經理人會唔會輕鬆啲？）唔關事嘅，純粹係去到唔同階段，想做唔同嘢，有唔同嘅追求。（叫太太放慢腳步陪你？）佢邊慢到，秋天叫佢陪我睇紅葉先攞一個星期假期，佢好忙鍾意成班人、熱鬧，我就鍾意自己一個人，有時會一個人去返鄉下。（會唔會做舞台劇？）唔夠膽做，因為要好多時間去排，做舞台劇仲驚，以前唱歌已經好驚，要講緣分，睇吓夠唔夠膽，放得低就去做。（少啲戲份試吓先？）一係唔做，一係就做多啲。（會再搵經理人？）唔知，講緣分，緣分到就有咁嘅需要。（多唔多人爭住做你經理人？）我唔知喎，要問劉嘉玲，我真係工作唔多，暫時劉嘉玲頂住先啦，我成年都唔拍戲，拍完下套，可能我又一年唔拍。（半退休？）又唔可以話半退休，隨心，想做就去做，唔想做就唔做。」

此外，在台上唐嫣用廣東話向觀眾打招呼，她被主持問到可有跟其他女生一樣被梁朝偉「電眼」電親？她笑說：「我也不例外。」