唔專心所致!張寶兒為放余德丞黑白照解畫

20180825
東網電視
更多新聞短片
張寶兒為黑白照事件解釋!
藝人張寶兒出席兒童學術比賽,提到早前余德丞昏迷入院,她將合照轉成黑白色放IG,引起誤會而受網民指摘,她坦言以後會小心處理,並解釋:「張相係我哋拍《鐵探》時影,諗住套劇出街先放上網,我覺得黑白色代表嚴謹,好配合套劇嘅風格,所以一早就設定咗黑白色,到余德丞入院,呢張係我同佢最近影嘅相,所以就放咗上去,我其實有一刻閃過要轉番彩色嘅念頭,但當時同人傾緊偈,唔係咁專心。(余德丞有冇嬲你?)佢冇嬲,佢醒番已經傳訊息畀我,佢有問番套劇嘅進度,佢嗰part已經拍完。我哋間中有傾偈,因為大家有個群組。(會唔會約同劇演員一齊去探佢?)有傾過,但時間未夾到,等佢健康啲先。」
寶兒承諾下次玩社交網站會更專注,問到貼文之前會否先讓男友袁偉豪過目?她說:「係,要好好學習小心啲,我有時好大意。有個好好嘅前輩提醒我,可以隨心,但唔可以隨意。」
----------------------------
東網巨星開咗ig喇,大家快啲follow啦!