拍劇勁辛酸！吳卓羲7日冇瞓：得番個軀殼

藝人吳卓羲（Ron）與劉心悠出席電影煞科宴，心悠更化身生日大使負責推蛋糕為下月2日39歳生日的Ron提早慶生。

Ron表示生日正日會與家人食飯慶生，講到生日願望，他說：「多啲工作，拍多啲好作品，可以同唔同演員合作，最緊要身體健康。」Ron透露現正休息中，稍後要拍攝網劇《飛虎2》、電影及內地大型劇集。

心悠因之前在女人街拍戲天氣太熱而皮膚敏感，她表示正康復中：「又化妝又流汗，皮膚好敏感，加上呢套戲好多夜戲，無論皮膚同健康都唔好，我平時早睡早起，拍戲收工嘅時間係我平時起身嘅時間，我睇咗皮膚科醫生食咗類固醇，塊面有少少腫，食一個星期藥就會好。」至於Ron笑言開夜戲完全無問題：「喺無綫拍劇訓練有素，瞓覺兩個字與我冇關，收工只係返屋企沖個涼又開工，我最長時間試過七日冇瞓。」

心悠自言之前拍《宮心計2深宮計》試過三日不眠，已經覺得受不了，難以想像七天沒睡，Ron無奈說：「捱唔到就冇得撈，但當時真係得個軀殻，係冇靈魂咁同對手做戲，個腦係記唔到對白，記得當時係最後一場戲，拍到凌晨四、五點，我同松哥（劉松仁）做對手戲，當時拍到第三take，我講第一個字已經NG，導演見到就叫我收工，我揸車嘅時候，車速五十公里，剷咗上壆。」

問到心悠拍劇時會否要求有足夠睡眠時間？她坦言：「公司會幫我爭取，超時都係因為大家想做好啲，如果大家都冇得瞓，我都唔會要求瞓，大家一齊拍好套劇。」