《延禧》大結局 五大疑團仲未破!

20180827
東網電視
更多新聞短片
未解決,未解決!

《延禧攻略》大結局,最終係happy ending,瓔珞最終晉升皇貴妃,同乾隆相親相愛!但就有劇迷嫌唔夠喉,話劇中仲有五大疑團仲未破!

第一:高貴妃同魏瓔寧咩關係?

《延》總製作人于正曾經上載過張魏瓔寧同高貴妃嘅相,睇落仲好親密!因為劇情冇講到佢哋之間咩關係,依家仲係一個謎,網民無限揣測,話高貴妃鍾意做戲,而魏瓔寧係繡功最好嘅宮女,指高貴妃嘅戲服都係魏瓔寧所造,所以佢哋兩個好老友!


第二:裕太妃畀雷劈,原理係點?

劇情就話係話裕太妃係畀雷劈死,咁瓔珞究竟係點做到嘅呢?有指瓔珞喺紗帳做咗手腳,將絲線換成了金屬線,劇情當晚咁啱雷暴,而裕太妃咁啱又手捉住紗帳上,最後畀雷劈死!

第三:純妃之死

純妃劇中始初係與世無爭,咩都唔理!但最後都黑化咗,仲要黑得好徹底,仲殺埋皇后個仔,間接搞死皇后!最後佢被打入冷宮,而佢嘅死都係一個謎團,劇情話佢係畀人用風箏線勒死,但因為太過血腥,所以冇播到出嚟。

第四:爾晴個仔老竇係邊個?

好多人懷疑係乾隆,但有網友指一切都係爾晴自導自演,話佢個仔真正老竇其實係傅恒弟弟傅謙!又有人話,爾晴同傅謙私通,有咗BB之後,爾晴怕丈夫傅恒知道後會殺死咗佢,所以爾晴設計話BB係乾隆嘅,搞到傅恒唔敢殺佢,又可以羞辱唔愛佢嘅傅恒!

第五:Cut咗咩劇情?

有指《延》之前有94集,最後cut到得番70集,足足冇咗24集劇情,究竟cut咗啲咩呢?遲啲又有冇未刪減版本睇?有指部分Cut咗劇情,係關於瓔珞所生嗰兩位格格嘅劇情。