難忘相處點滴　鍾鎮濤感慨憶送別陳百強

今年9月7日60歲冥壽的80年代巨星陳百強（Danny），離世25周年，多位生前好友歌手將重新演繹其經典歌曲，推出紀念專輯及舉行演唱會，一同追憶Danny。

慨嘆走得太早

《環球高歌陳百強演唱會》將於9月9日在灣仔會展舉行，Danny契哥鍾鎮濤（阿B）與劉美君談到這位老朋友，腦海都會浮現無數相處畫面，尤其阿B與Danny關係儼如家人：「細細個兩家人已經好熟，同佢都有個爛Gag成日講，就係佢係我阿媽嘅契仔，咁佢就係我契…次次未講完大家就哈哈大笑。」Danny已離開25年，阿B感覺恍如昨日，他想起在病房中送別對方：「仲記得佢走嘅Moment我喺度，摸佢手係暖嘅，手腫腫哋，但仲係好靚仔，咁就25年！」他感慨說：「遺撼係佢真係走得太早，如果冇事嘅話，可能仲係一齊玩到依家，我繼續做佢演唱會嘉賓，佢又做番我嘉賓，大家好開心講吓着咩靚衫。」

大讚Danny

劉美君出道時，Danny已經是超級偶像，她慶幸因唱歌而有不少同台機會：「佢官仔骨骨、個人又Nice，最記得第一次喺錄音室，佢見到我就讚：『你好型呀！我好鍾意你。』嗰刻我個心係跳咗出嚟，唔識反應。（工作以外有冇私交？）當年大家都鍾意去DD（80年代香港著名Disco）跳舞飲酒，咁算唔算私底下有聯繫？」

風格獨特

Danny短短35載人生，留下作品750多首，每首都聽得歌迷心醉和懷念。今次紀念專輯中，阿B選擇演唱《一生何求》：「好多心水都有人揀咗，呢首竟然冇，我梗係揀啦！」劉美君則鍾情《粉紅色的一生》：「我崇洋，佢又唱得幾外國Feel，原曲係首法文歌，但佢唱嗰句『不要呆呆的等呀』，唱得好得意，加咗啲廣東話口音落去。」阿B指Danny是受父親的影響：「佢爸爸有唱粵曲，有佢啲腔調，佢聽英文歌係番書仔，但唱歌個Tone就有啲傳統廣東歌味道，風格好特別。」至於Danny的紀念演唱會，二人稱不會只唱一首歌，還會打扮得最靚上台，劉美君說：「佢咁貪靚，唔係嘅話佢喺上面會話『嘩，劉美君你着到咁嚟？』咁就唔好啦！」

劉美君

髮型：Gary Sun@Hair Corner

化妝：Kris Wong

服裝：Moschino（Bluebell HK）

鍾鎮濤

化妝：Wendy Lee@Wendy's Workshop