13期訓練班聚會　楊怡林峯激罕合體惹哄動

尋日（30日）係楊怡39歲生日，不過佢竟然唔係同老公羅仲謙一齊過，而係同相識20年嘅同期藝員訓練班好友慶祝兼Gathering，真係勁熱鬧呀！壽星女喺社交網上載照片，見到有張美妮、陳少邦、徐榮、楊明、趙永洪、李忠希、傅楚惠等十多人，仲有貴人事忙嘅林峯都喺度呀！

佢哋不停自拍，林峯仲飲到面紅紅添，就知佢哋玩得幾開心啦！楊怡留言：「相識已是緣份（分），感恩我們能相遇、相知、相惜，20年的友誼，不容易❤13期萬歲❤開心難忘的830　謝謝大家」

網民都留言話好開心見到佢同林峯合體，好希望「峯怡」可以再合作拍劇！仲有唔少人諗起佢哋啲劇，包括《流金歲月》、《大唐雙龍傳》、《布衣神相》等，仲有唔少網民留言「犀利妹同Kingsley」，係邊個？咪就係2010年佢哋喺《談情說案》嘅角色囉，可想而知呢對「情侶」有幾深入民心啦！如今楊怡都做咗人妻，唔知幾時到林峯做人夫呢？