肥到差啲要戴Bra　孫耀威想變李小龍

歌手孫耀威（Eric）今日以慈善大使身份出席豎琴基金會成立典禮，受訪時Eric表示平時都好難接觸到豎琴，覺得其聲音非常特別，又指之後造歌、甚至於11月中九展舉行的處男騷更有意加入豎琴元素。

天生肥底

講到已開售的兩場個人騷，問到是否周身飛債？Eric笑言全交由公司及太太陳美詩負責，不過日日都會收到朋友Message話要握手位，都好感謝有好多人支持。為個唱積極操弗的他，由今年4月開始特訓，至今已成功搣甩10磅，但離目標就要再減多10磅：「希望以最弗狀態開騷，想練到好似李小龍咁鋼條型，始終自己係天生肥，成家都好鍾意食甜嘢同肥嘢，難減啲。」更自嘲即使修身成功都仲好「大波」：「唔好睇我塊面瘦咗咁，之前肥到差啲要戴Bra！（之前最重幾多磅？）有160磅，依家就係慢慢減磅，太快驚有情緒病，自己咁鍾意食嘢，依家140幾磅，希望減到130磅。」

好難揀歌

至於歌單方面，Eric大爆要割愛：「Rundown都排咗9成，會再修改。（會好難揀歌？）都會，自己都有成30至40張唱片，又想唱啲當時喺台灣出道嘅國語歌，不過喺香港開騷就當然唱多啲番廣東歌，都好唔捨得，同埋又想唱吓人哋嘅歌，都忍痛刪走自己啲歌，想唱畀Fans過癮吓。」