講羅天宇即落閘　陳瀅轉話題賀陳嘉寶佗B

藝人陳瀅到九龍灣出席餐廳開幕活動，除了試食新菜外，更被現場的魔術師氹得非常開心，她坦言以往只試過幫手做簡單魔術，又自爆曾被男生取得手機密碼：「佢話佢會估到，點知真係得！（戶口啲錢都畀佢轉走？）當時未有咁先進。」問到緋聞男友羅天宇可懂得玩魔術？她就表示不想再談：「以往拍拖我會認，但呢個真係唔係。其實之前都傳過，唔知點解又炒番起，好無謂。」提到不乏追求者，她表示不算多，有跟對方吃飯和交流，但暫時未有想發展的對象，加上工作很忙、分身不暇：「依家拍緊一部電影同兩部電視劇，連《跳躍生命線》宣傳同新劇記招都去唔到。」

唔使爭做契媽

談及好友劉佩玥（Moon）與周志文早前因船P洩蜜，陳瀅自言當天不在場所以不清楚，又轉話題恭喜陳嘉寶（Anjay）佗B：「我今朝起身開IG先知，即刻成個人彈起，嗌咗出嚟，即刻send message去group chat，Cheronna（吳嘉熙）都send張相出嚟話感動到喊。」陳瀅指看着好友們結婚生仔，心情非常興奮：「我哋唔使爭做契媽、實會做，個BB一定得到萬千寵愛，因為Anjay人緣好好。（買咩禮物？）未諗，因為未知係男定女，但我哋星期六會見面，睇吓到時佢肯唔肯講。」