頤養天年之選！李彩華米蘭朝聖險被偷嘢

李彩華喜歡旅行，曾踏足多個不同國家，惟獨歐洲令她情有獨鍾。身為虔誠教徒的她，早前走訪意大利多座極具特色的著名教堂，令她大開眼界。她更有意在歐洲置業，為日後歎世界的日子鋪路。

藝人李彩華（Rain）喜歡周遊列國，今年因工作關係，分別到了德國、冰島和意大利等多個地方。一向孝順的她，早前偕同母親到意大利，首站到了當地最著名的米蘭大教堂（Duomo di Milano），它坐落於米蘭市中心的大教堂廣場，是意大利最大的教堂。身為教徒的Rain表示，多年來一直希望到此一遊：「因為建築好宏偉，好有宗教味道。入到去成個環境好安靜，連心境都變得好平靜，可以洗滌心靈，大開眼界。」

撲飛睇《最後的晚餐》

Rain亦到了天主教恩寵聖母大教堂（Santa Maria delle Grazie），和旁邊的「多明我」會院，會院食堂內的達文西名作壁畫《最後的晚餐》，是於1498年意大利文藝復興時期的作品，1980年被列為世界遺產，所以吸引到世界各地遊客慕名而來，成為全球最難買的入場門票之一，幸好Rain一早透過朋友預購才能順利入內欣賞，她說：「真係好感恩撲到飛，入到去第一眼見到幅畫，覺得好震撼，當時發生過嘅事好似呈現咗喺眼前咁，但現場睇其實幅畫比較朦，但感覺好深刻。」

坐小艇遊威尼斯

此外，意大利威尼斯「水都」之名譽滿天下，市內主要以水上交通工具代步，她亦乘坐小艇暢遊，途中經過不少設計極具特色的建築物，她說：「當日天氣好好，好舒服，令人心曠神怡。」

幾百萬買西班牙樓

喜歡買磚頭作投資的Rain，直言曾有意在歐洲置業，亦諮詢過當地朋友的意見，她說：「歐洲嘅生活、文化同天氣都好易適應，畀人一種好舒服嘅感覺。朋友介紹話喺西班牙置業港幣幾百萬就得，去其他歐洲國家都係幾個鐘頭飛機，感覺都幾方便。就算唔係長住，有時間去度假都好，總好過成日住酒店，或者日後有機會喺嗰度歎世界。」

小偷扮大肚婆埋身

可是基於治安問題，令Rain需要慎重考慮：「歐洲治安係一個問題，好似喺米蘭嗰陣，有次喺火車站見到有兩個大肚婆，成日喺我身邊出現，因為我知好多小偷會扮成大肚婆行事，會將啲偷到嘅嘢放入假肚，結果同行嘅私人導遊拆穿咗佢哋，點知嗰兩個大肚婆仲惡過我哋，不停喺車站大叫，跟住導遊帶我哋離開，有驚無險。」

踩牛牛地磚轉運

購物是女人的天性，來到米蘭，Rain當然不會放過大好機會。她到了當地著名的購物勝地Galleria Vittorio Emanuele II，該處設計獨特，頂部是一個玻璃圓頂可透光。此外，有傳只要用腳踭在廣場上的牛公仔地磚轉三個圈，便會帶來好運，Rain當然亦不忘一試。

----------------------------

東網巨星開咗ig喇，大家快啲follow啦！

https://bit.ly/2JjSVcr