港姐冠軍又亂噏！馮盈盈「公廁論」嚇窒網民

2016年港姐冠軍馮盈盈當選以來，口才了得，加上講嘢出位不着邊際，近年備受無綫器重，除了鐵膽主持清談節目《#後生仔傾吓偈》外，今年又做港姐司儀，人氣高企。

禍從口出，繼之前關於兩性關係言論出事後，盈盈又再瀨嘢！在本月10日播出第178集的《#後生仔傾吓偈》中，盈盈和麥明詩對「港姐嫁有錢人」的話題，你一言我一語，十分激動。

節目中陸浩明先勾起話題說：「如果男仔入贅就畀人話食軟飯。」馮盈盈即說：「如果我哋嫁畀有錢人，就畀人話睇死佢啦！想吊金龜啦！係雞，係公廁！」麥明詩說：「畀人話選港姐就係為咗咁咋嘛！」盈盈咁都噏得出，唔少網民都留言話盈盈身為港姐冠軍，應該要謹言慎行！