陳家樂拍戲上天下海堅玩命：諗番都驚
20180915
東網電視
更多新聞短片
陳家樂拍戲要上天下海。
藝人陳家樂、洪卓立、曾樂彤及許靖韻下午到馬鞍山出席「英皇電競菁英盃2018」記者會。家樂受訪時坦言曾戒「打機」10年：「當年因為迷打機荒廢學業，所以要戒咗佢，不過去年生日有朋友（前度）送咗部遊戲機畀我，先發現依家打機配套好多，觀感十足，會約埋大班朋友齊齊打足球遊戲，嚟緊打風我哋都約咗嘞。」
近日忙於拍攝英皇電影《神探大戰》的他，日前開工拍墮海戲，認真危險兼玩命：「喺隻船上面吊埋鐵臂，我同湯怡要喺等同3層樓嘅高空追逐，中間只得1個身位咁闊，加上我唔係咁熟水性，拍嘅時候正常演戲，但停落嚟諗番都幾驚。（冇同屋企人講？）冇呀，到佢哋睇戲先算啦，如果唔係我嫲嫲實鬧死我，以前我拍打交戲佢都信以為真㗎！」
----------------------------
東網巨星開咗ig喇，大家快啲follow啦！