拍戲鬧不和　靚靚楊張新悅21年後世紀破冰

藝人袁詠儀（靚靚）與楊張新悅於1997年拍攝電影《戇星先生》嘅時候，曾經因為推撞事件而鬧不和，當年靚靚更公開指摘當時拍戲嘅新人包括楊張新悅不專業，而楊張新悅早年做訪問都話同靚靚有「牙齒印」，雙方關係認真麻麻！

不過，相隔21年，兩人亦做咗媽咪，當然會成熟唔少，而今日名媛薛芷倫就喺Instagram上載咗佢同袁詠儀、楊張新悅嘅合照，仲以「世紀合照」、「世紀大和解」來形容佢哋終於破冰！

楊張新悅也直言尋晚確係廿年後第一次同枱食飯，至於以前嘅不快事，佢就以「唔記得」嚟回應：「我生咁多小朋友記性差，舊事唔記得了！哈哈！20年後再有機會遇見以前一起工作的人感覺良好。當晚是我喜愛護膚品牌的10周年慶祝宴會，與美麗的裝飾、人和美食度過，是一個愉快的晚上！希望傳媒不要認為我們有甚麼問題了。」

事後，薛芷倫接受東網訪問時指佢哋昨晚出席護膚品晚宴，席上兩人有傾有講，全冇芥蒂，話題都係一啲扮靚、小朋友嘅嘢，完全睇唔出曾不和，薛芷倫表示：「我都係事後先知佢哋之前有啲誤會，尋晚佢哋有傾偈之餘，仲有自拍，兩個都好好，始終大家都成熟咗，做番朋友都係開心事。」