鎮住山竹！網民轉發「謝霆鋒」符保平安

颱風「山竹」襲港，為安全起見，男女老幼都留喺家中，不少網友除咗喺社交網發布及轉發市面受風災影響嘅訊息，更有網民創意無限，揚言有「謝霆鋒」就可保平安！有網民採用謝霆鋒嘅Chok相並寫上「轉發這個『謝停風』保平安」，原來係玩食字，將謝霆鋒嘅國語諧音寫為「謝停風」，呢道「平安符」即被瘋狂轉發！

另外，有傳再度有喜嘅天王嫂方媛，風大雨大，當然留喺家中陪住老公郭富城，佢拍下住所附近倒下嘅大樹，喺社交網呼籲大家要小心：「希望山竹快點離去，大家一切小心，平安。」至於同樣安在家中照顧子女嘅靚媽陳茵媺，則上載家中嘅大燈搖晃短片，並留言指感到大廈搖晃，自己有啲暈眩外，更言浴缸同樣出現搖晃情況，反問係咪應畀小朋友沖涼呢？

而導演周顯揚亦喺facebook上載屋企不斷搖晃嘅片段，其中一段見到有盞吊燈不停左右搖擺，非常犀利！