豪宅曝光！李治廷玻璃門門檻被吹爛勁狼狽

強颱風「山竹」吹襲，威力勁到不得了，即使做足防風措施都搞唔掂！好似李治廷咁，佢話屋企嘅玻璃門嘅門檻都被吹爛咗，佢要自己撐住個玻璃門，佢喺社交網話：「感覺山竹正在離開香港但威力還是好強。玻璃門的門檻已經被吹破了。不撐著（着）感覺隨時會塌陷……大家一定要注意安全，做好安全措施！…我怎麼感覺這畫面似曾相識。」佢講緊嘅似曾相識相信就係佢8年前有份出演電影《歲月神偷》嘅情節喇，因為當中有場高潮戲，就係十號風球下，羅記一家人拉住個屋頂，話要「最緊要保住個頂」呀！

隨後，佢仲上載一段自拍片邊拍邊講家中出面嘅情況，不過唔少網民就將個重點放喺佢屋企，話佢豪宅曝光，睇到佢影到屋企唔同角落，都覺得大到不得了呀！

蔡一鳳間房濕晒

另一邊，名媛蔡一鳳（Michelle）亦都喺網上分享一段佢喺澳門屋企嘅主人房「水浸」片，見到成間房都濕晒，佢就話：「頭先先講完香港間屋暫時無恙，細佬已經報告我澳門屋企受災 工人姐姐話她真係閂晒啲窗，應該啲窗俾（畀）強風吹開咗！樓下客廳暫時冇事，樓上主人房水浸 。」她接受電話訪問時表示：「我個單位好近海，加上大雨，啲水入晒去間主人房，好在樓下保安發現得快，通知我住喺附近嘅細佬上嚟，佢過嚟幫我關窗，但佢話太大風，所以閂唔到，好在下面個客廳，離個窗有啲距離，冇水浸，否則就大鑊喇！」