【吹呀吹】徐小鳳尾場大合唱:將山竹趕走

20180917
東網電視
更多新聞短片
吹呀吹 讓這風吹~
殿堂級歌手徐小鳳共六場假紅館《金光燦爛徐小鳳演唱會2018》原本昨晚(16日)尾場,惟受超級颱風「山竹」影響,順延一日至今晚舉行,同時亦接受觀眾退票,就現場所見入座率只得七成。演唱會準時於8時30分開始,身穿露肩白色公主裙的徐小鳳唱畢經典歌《漫漫前路》,就開金口感謝大家來臨,並話:「喺咁惡劣嘅天氣之下一樣嚟支持我,衷心多謝!」唱至《風的季節》中段時「吹呀吹 讓這風吹」,仲叫現場觀眾一齊大合唱:「我哋一齊呀!一齊將『山竹』趕走!」認真爆笑!
唱完《風》,徐小鳳又開講「棟篤笑」,有觀眾於台下大笑時,她即問:「未講嘢就笑?打風都笑得咁開心?」再續講:「今晚真係一個戰戰兢兢嘅晚上,非常之擔心,但一樣見到你哋,出面就滿目瘡痍,呢度就好井然。」此時台下有觀眾大叫「風雨同路」,徐小鳳聞言即話:「多謝你,我係會同你哋風雨同路。」隨即講到今朝一起身驚見屋企樓下冧了十棵樹,笑言:「唔知點嚟紅館,有諗過着埋條波波裙搭直升機吊威吔過嚟,但香港人做嘢速度好快,用咗2至3個鐘,啲樹就消失得無影無蹤,唔知邊個搬走咗,但好多謝你!」台下即拍爛手掌!