前有線主播嚴崇天（阿天）近日離開工作10年嘅有線電視，直言好唔捨得，但認為人生唔同階段要追求唔同嘅嘢，佢話：「啱啱大學畢業就加入主播行列，由一粒薯仔咩都唔識，但好幸運當年可以向陳貝兒、陸浩明、區永權呢班咁好嘅主播學習，自己曾經離巢過又返嚟，公司都仲好畀機會我，畀我去唔同影展見識、好開心。」

阿天喺有線工作期間識咗好多好朋友，雖然大家已各散東西，但感情依舊深厚，佢表示：「真正認識嘅朋友都保持良好關係，唔會因為唔同公司就唔搵對方。」佢仲話自己呢幾年變成公司資歷最深嘅主播，對於被外間稱為「末代主播」，難免都有啲唏噓，不過阿天已經有新動向，佢透露：「同舊同事尤蔭蔭開咗間公司搞培訓，亦會繼續接司儀工作、試唔同嘢，依家首要任務係去韓國培訓韓文，因為自己好鍾意韓國文化，希望韓語流利啲、增加多啲工作機會。」