片場失火！羅家英冇同汪明荃報平安

藝人羅家英日前在馬來西亞拍攝爆炸戲時險受傷，而拍檔楊盼盼不幸燒傷，今日羅家英由當地返港，約六時許步出機場入境大堂。問到有否探望楊盼盼？他說：「尋晚有，情況好啲，燒到當然好痛，見到佢塊面搽咗好多燙火膏，成面都係。（做手術？）我都唔知，我今朝知導演去開記者會，之後我上飛機，未知佢哋情況點。（擔心影響皮膚？）都好擔心，睇落唔係好覺，佢面部係二度淺層皮膚燒傷，手就三度燙傷。當時我唔需要入場，我係離遠見到，當時劇組功夫做得好好㗎喇。（擔心楊盼盼毀容？）有問過醫生話冇嘢，都係水泡，換過新皮應該冇事，原本楊盼盼會去台灣做手術，而目前已改期。劇組有買保險，當時15個人入晒醫院，有啲受傷公公婆婆安慰番導演轉頭，不過有位公公嚴重少少，燒傷加脊椎移位，因為年紀大冇做手術。」

提到楊盼盼受傷時的片段曝光，羅家英否認因火槍引起火災，他表示：「我自己都有拍啦，係啲電油漏咗喺地下，之前又落過水，啲電油浮喺水面，水溝油咪變得成，係電油搶火，啲公公婆婆見到火都走唔切，係一、兩秒嘅事，唔係跳高都避到。楊盼盼都好擔心其他人，啲公公婆婆又跌低，當時盼盼企喺前排，如果我拍呢個戲份都要企前排。」問到戲份是否拍完？他表示仍有一日戲但已取消，而楊盼盼仍有戲份未完要等劇組再安排。而太太汪明荃亦有問侯他，但自己未有報平安：「事件後都要等劇組安頓先，安頓晒都天光喇。（佢唔接你？）有你哋接我咪得囉！不過我都要交人，約咗佢食晚飯。」問到會否有陰影？羅家英說：「我都睇慣呢啲場面，現場有女仔受驚失晒控，不停叫咗成個鐘，嗌到想嘔咁。」他又指同場的梁祖儀受輕傷：「佢跳咗上去所以燒親腳，當時係我載佢去醫院。」