堅持做自己！鍾舒祺自資六位數出歌

歌手鍾舒祺（Sukie）到電台宣傳新歌《裸泳》，表示新歌行80年代風格：「以前啲人裝束、歌曲好容易表達自己、放啲，反而依家啲人好多制肘，包裝多咗、自由少咗，難做自己，所以首歌係講一個態度。」她表示新歌由王雙駿一手包辦，之後都會一直合作做歌，她亦透露自資了六位數字出歌：「但係好值嘅，買咗個自由返嚟，大家有個空間去創作。」講到MV，她笑言完全沒有裸泳畫面，但透露由兩位年輕導演執導：「佢哋好有Heart，畫面、燈光、道具完全做到嗰回事，道具係用成個貨櫃車咁車嚟，我入到去係嚇親，以為自己係巨星。」

講到歌曲內容，問到最做自己的一次是怎樣？她笑言一直都是這樣，反而問她最斯文內斂的一次就答不出。她亦表示男友是跟她同類型的人：「佢係好有態度嘅人，不過佢係好Cool嗰隻、出名冇聲，當然我同佢交流到，但佢出去唔交流，而呢首歌嘅結他都係佢幫我彈。」講到與男友感情穩定，問到可會計劃結婚？她表示：「未傾，結婚擺酒要20、30萬，我寧願攞啲錢嚟做多兩隻歌好過。（唔擺酒齋簽字，旅行結婚咪得囉？）我又冇諗過，你提咗我，但大家唔係呢個階段，音樂路上仲有好多嘢想做。」