《還珠格格》名單疑曝光　網友：摧毀回憶！

「神劇」《還珠格格》於1998年播出，當時成功捧紅趙薇、林心如、周杰、范冰冰及蘇有朋等，人物角色形象鮮明，即使之後續集換人繼續播，但係一班「元老級」演員喺大家心目中嘅地位完全冇動搖，真係「唯獨你是不可取替」！

事隔20年，《還珠》作者兼出品人瓊瑤宣布將重新拍攝《還珠》，仲講到明翻拍重點要用「年輕人喜歡的方式」出發，搞到網民議論紛紛，叫瓊瑤放過大家嘅童年回憶。到咗今日，被指係《還珠》嘅「演員名單」喺網路流傳，定妝表時間為今年12月，陣容大部分都係新生代演員，小燕子就會由大陸演員楊紫演出，紫薇會係啱啱嫁人嘅張馨予飾演，五阿哥就搵嚟新版《流星花園》中嘅「道明寺」王鶴棣，更有傳范冰冰細佬范丞丞都有可能出演。不過最令人驚訝嘅，就係喺原在《還珠》飾演皇后嘅戴春榮竟然變咗做容嬤嬤……

此名單一出，大批網友都唔睇好，負評如潮，更有人直指呢個陣容係「摧毀童年回憶」！有大陸媒體就向劇方求證，對方就回覆表示選角都未正式開始，邊度嚟個演員陣容。而張馨予亦喺社交網表示自己「這麼彪悍彪悍演不了柔弱的女子。」見到呢啲回應，相信網友嘅心情都定番好多。