撐馮盈盈公廁論！工藤佑采暗寸莊思明Cheap

2016年港姐冠軍馮盈盈早前喺節目《#後生仔傾吓偈》中爆出「公廁論」：「如果我哋嫁畀有錢人，就畀人話睇死佢啦！想吊金龜啦！係雞，係公廁！」嚇窒網民。一班港姐前輩反應不一，莊思明批評「好Cheap」，而麥明詩就撐馮盈盈兼話批判者膚淺。其後馮盈盈解釋只係覆述網民意思，並唔係佢自己嘅諗法。過咗一排，以為件事已經告一段落？少年你太年輕了！

只係覆述事實

因「被鞭屍」黑面跳舞而一夜成名嘅落選港姐工藤佑采，早前同過師姐黃心穎爆罵戰，冇見一排佢依然咁好火，但今次就係為馮盈盈抱不平！今日凌晨佢發長文力撐對方「公廁論」冇問題，話馮盈盈只係覆述事實，字裏行間更暗寸莊思明：「可能言語上身為一個港姐，係有點大膽，但係同Cheap好似點都拉唔上關係！Cheap嘅定義唔係應該係無啦啦又冇得罪你、又冇話你，但是你自己又話人哋在先咩？」

自爆前男友係金龜

工藤佑采話之前見過馮盈盈，覺得對方幾靚幾可愛，係講嘢有啲太大膽同太真實。佢仲自爆：「好彩我比賽之前同男朋友分咗手，如果唔係可能都會畀部分人話我（睇死佢釣金龜）、（係雞）、（公廁）！」睇嚟佢前男友都有啲家底喎！最後佢就話支持馮盈盈做自己，唔戴假面具做人，雖然呢份心意遲咗個幾星期，但遲到好過冇到嘅！

刪除批評黃心穎發文

呢個Post一出，唔少網友都留言支持佢嘅睇法，力撐馮盈盈冇問題，當中仲有網友爆料話留言問過莊思明嘢之後就畀佢同男友楊明封鎖咗。此外，仲有心水清嘅網友發現工藤佑采之前批評黃心穎嘅發文「被消失」，但佢就未有回應。工藤佑采果然係「是非女皇」，一個Post都畀到咁多花生大家食！

----------------------------

東網巨星開咗ig喇，大家快啲follow啦！

https://bit.ly/2JjSVcr