郭富城拍戲有幾專注？導演爆佢咁樣都唔知！

影帝郭富城及導演莊文強日前接受TVB娛樂新聞台節目《StarTalk》主播許文軒（Edmond）專訪，大談拍攝電影《無雙》感受，兩人互笠高帽，城城說：「我係導演嘅小Fans，覺得佢視野好闊，係好好嘅學習對象。」導演亦大讚城城專業：「其實由《父子》開始，覺得佢好似變咗另外一個人，之後《踏血尋梅》同《寒戰》，更加對佢流晒口水，而佢嘅專注係超乎我想像，有場戲拍到流晒血佢自己都唔知。」

自責中途去做商演

談到對自己要求高，而且力求完美，城城說：「好多身邊嘅人都知我好投入同集中做一件事，我係可以好癲，但拍攝途中我應承咗要去做商演，返到劇組後，有場戲我覺得自己做得唔好，好擔心，有怪自己，其實甩咗一日係好危險，因為一走咗個情緒，返唔到嚟點算，最後我堅持要做到個情緒，要求重拍咗好多次。」

周潤發係童年陰影

問到電影宣傳片中，周潤發重現《英雄本色》經典一幕，導演說：「食煙燒銀紙一幕只會喺宣傳片內出現，初初發哥都有啲抗拒，連發嫂都走過嚟問我哋搞乜，我覺得可能係信任，發哥見我呢個四眼仔應該唔會呃佢，所以最後同我哋重演咗呢一幕。」問到係咪對周潤發有情意結時，導演笑說：「係，細個睇《英雄本色》睇咗一個暑假，一日睇三埸，原則上發哥同《英雄本色》係我好大嘅童年陰影。其實唔止《英雄本色》，《無雙》內仲有《喋血雙雄》、《賭神》同《大丈夫日記》嘅元素喺裏面，如果燒銀紙放埋喺電影裏面，咁就實在太過分，因為超過部戲嘅真實。」

----------------------------

東網巨星開咗ig喇，大家快啲follow啦！

https://bit.ly/2JjSVcr