【要請教黎明】陳奕迅鐵定中環搞慈善音樂會

「吹神」陳奕迅（Eason）到電台受訪，宣布10月27日將與the duo band在中環摩天輪底空地舉行一場慈善音樂會：「想回饋番香港，本身因為要經過好多程序、安全、技術嘅嘢，有諗過咁煩不如算，將做製作嘅錢捐出去就算，最後皇天不負有心人。」他謂會在「核心內圍」開騷，又提到黎明（明福俠）曾在同一地方開騷，笑言：「我要問下明生先得，多謝佢啲月餅，好正，未試過收到明福俠嘅月餅。」

一千零一場

他亦謂今次開騷招待千多人，搵了十多間慈善機構受惠，少量門票是給電台觀眾，到時會對名。問到到時可會唱大聲些給「核心外圍」的人聽？他謂都知道要控制聲量，到時會跟各方協調。他亦謂今次主要對象是邀請十幾間慈善機構的青少年：「好想畀啲正能量佢哋，因為覺得音樂可以治愈好多嘢，不過今次開住一場先。」又笑言：「之後會做番啲商業演唱會，依家度緊㗎喇，到時會有大量門票治愈更多人，我都想搵番餐晏仔食。」問到今次搞慈善音樂會可是動用很多人力物力財力？他表示：「唔係，係用好多愛去做啲細微嘅嘢，心存好事就會將正能量散播開去，我都好期待。」

「有愛」先會攞到飛

問到是否想幫有情緒病的青少年？他表示考慮到如果有情緒病、自閉或智障病患者，聲音可能會刺激到他們，所以今次開騷未能預到他們，留待下次，之後再想不同方法幫他們。他亦表示今次開騷是自己落手落腳搞，但不肯透露成本：「唔想講，總之做得開心就得。」另外，講到今次他上電台做限定主持，接聽眾電話傾心事，問到是否任何話題都傾得？他表示：「係，不嬲冇界線，但唔係打電話上嚟就有飛攞，要睇吓佢係咪有愛嘅人。」

----------------------------

東網巨星開咗ig喇，大家快啲follow啦！

https://bit.ly/2JjSVcr