等賜封！楊怡爆林峯帶國產女友見班Friend

藝人楊怡、林峯、馬國明等晚上到將軍澳出席晚宴活動。林峯最近陪伴女友張馨月到內地江蘇鹽城出席女友弟弟婚禮，關係似乎更進一步。由深圳趕返港出席活動的他則沒有接受訪問，似乎是要迴避感情問題。

楊怡與林峯十分老友，早前還與藝員訓練班同學飯敘，問到她可有見到林峯女友，她笑說：「我驚講錯嘢，嗰日冇人攜眷呀。（見過林峯女友未？）相同真人都有見過。（林峯出席女友細佬婚禮？）哦，好事呀。我見過一次，印象好好，好nice，同我哋班朋友傾偈幾投契嘅，我唔講咁多喇。（戥佢開心﹖）梗係戥佢開心，因為每次見到佢都叫佢快啲結婚，都係時候差唔多啦。（聽你講結婚？）佢唔會聽我哋講啦，佢有自己嘅主意，唔使逼。」

楊怡透露老公羅仲謙已在內地拍完電影，近日在港過中秋，隨後亦會在港拍戲。問到豈不是「造人」機會大增？她笑說：「承你貴言，唔好咁啦，次次都講呢個話題，我走先喇，哈哈。（有壓力？）冇壓力嘅，但次次都問呢個問題，好驚呀。」講到《再創世紀》收視平平，楊怡沒有失望，認為最重要是有口碑，收視點就控制不了。