結婚唔夠兩個月分居？陳凱琳解畫：保護私隱

藝人陳凱琳（Grace）宣傳大使身份出席活動，受訪時講到與老公鄭嘉穎上月28日入紙登記註冊結婚，但擬結婚通知書上的登記地址不同，Grace聞言即避談：「我係用自己屋企登記，驚畀人發現（新住址），都想保護自己私隱。」

說畢便轉話題指現時做鄭太都會煮早餐，不過就自認手勢麻麻：「都係整多士、蛋，有進步嘅空間，想到時佢話食咩煮咩。（如果佢一早話打邊爐？）仲好呀！（有冇讚你手勢好？）佢唔會講咩評價，但通常都會食晒！」問何時會煮埋午餐、晚餐？Grace撒嬌話要慢慢來：「唔好要求咗高啦。（以為你要做Perfect Wife嘛。）係咪Perfect就要問番佢啦，拋個波畀佢，但我知佢會答呢個世界上冇Perfect嘅人。」

屈嘉穎開ig

講到嘉穎剛開了Instagram帳戶，她笑話是經過說服得來的「成果」：「佢之前係咁話唔識玩，但佢依家開咗Account都明可以畀大家喺唔同平台見到佢係開心事。（係咪要嚟放閃？）唔係，佢之後都有啲電影嘅宣傳，都係一個好時間去教佢。（識用限時動態？）呢個要返屋企再教佢。」可會有老公帳戶密碼？Grace即耍手擰頭話冇：「驚到時佢要我負責，又要問佢攞相。（呢個學生學得快？）So far so good，佢Post嘅第一張都幾好，幾開心，我第一時間就幫佢撳埋Follow我，互相Follow。」