惜肉如金!許志安誓保「貞節牌坊」唔肯露
歌手許志安(安仔)今晚為《星光熠熠耀保良》擔任表演嘉賓,分別與王君馨及黃心穎合唱:「尋晚已經綵排過一次,但見佢哋第一次喺紅館唱Live好緊張,所以今日再嚟綵排多次,畀定心丸佢哋。」
人愈大愈細膽
講到出場時要被吊至最高點彈鋼琴、與女聲合唱團合唱《Remember Me》,安仔話覺得感動之餘,又緊張:「因為我好畏高,為咗靚,而監製又話出嚟個效果OK,咁就乜都OK唔理咁多。(下次再叫你吊敢唔敢?)如果有安全感,就好似啱啱有部琴同我一齊,淨係望住佢咪唔知有幾高,但如果話吊威也咁飛過去就愈嚟愈細膽,以前都夠膽嘅,可能依家喺Facebook、IG睇太多條安全帶突然間甩咗。(會Check先出發嘛。)愈Check愈驚,愈摸佢就愈覺得唔知係咪甩咗,摸又驚唔摸又驚。」續指有次拍戲要於60幾層樓行出去,睇落好勇敢,但其實都NG好多次:「嗰次都有威吔吊住,但呢啲事不能逞英。」寧願露肉都拒絕吊威吔?安仔打趣話要誓死保住「牌坊」:「咁我寧願畀人吊!」
愛犬身體欠佳
問到愛犬Lucky最近的身體情況?他表示:「佢依家咩都慢晒,好似一個老人家咁,上網都查過佢呢個狗種都係13、14歲,咁佢依家都13歲,都有啲心理調較,盡量多啲喺屋企,但就唔會因此而推工作,唔好將呢件事覺得係影響到自己個心情,有啲朋友就係有寵物走咗,個心情走唔開。」又話現時會多多陪伴Lucky落行散步、去廁所,笑言要講多啲對唔住:「佢依家會忍唔住喺啲車前面(大小便)。」
同場還有「玉女獎門人」周慧敏大唱經典歌《最愛》及《孤單的心痛》,令現場觀拍爛手掌,唱畢她有感而發指是事隔23年再參與盛事,覺得光陰似箭!
----------------------------
東網巨星開咗ig喇,大家快啲follow啦!