網友勁恥笑寫錯「麻辛湯」　許凱罰抄補鑊

內地宮鬥劇《延禧攻略》中嘅小鮮肉「富察傅恒」許凱，最近成為新一代「萬人插」，被網友勁爆黑料，包括煙不離手、為選美整容、當街被前女友羞辱等，形象大坐過山車……以為咁就完？少年你太年輕喇，今次許凱又有新「黑料」，仲畀網友恥笑佢唔識字添！

日前許凱喺內地搞簽名會，吸引咗大批粉絲到場，點知佢就被一位「粉絲」出賣，晒出一張許凱「簽錯名」嘅鐵證！相中，許凱為粉絲寫上款時，就無啦啦寫咗「To：麻辛湯」，點知原來佢係想寫「麻辣燙」，「辣」字冇咗一半，「燙」就變「湯」，位網友仲爆料話許凱寫到個「辣」字時，仲卡住咗成分幾鐘，個「燙」字寫咗「湯」之後，又叫位粉絲自己加番幾筆上去，網友就用「我們懂的」嚟總結，個Post搞到許凱變咗被網友恥笑嘅對象，更有網友話佢「袋瓜真的是空空如也」唉……

不過，事後許凱都好識做，自己走去罰抄「麻辣燙」，仲將份功課放上網，都算幾有心㗎喇，咁有做都好過冇嘅……吓話…