關楚耀否認撻嫩版陳茵媺：大家都明㗎啦…

歌手關楚耀（Kelvin）、王灝兒（JW）到澳門舉行演唱會聯合發布會，其中Kelvin宣布於明年一月頭開騷，已經是第二次於澳門開騷的他指每次都好有回憶。記者笑問他是否賭錢贏好多？他笑話不是：「上一次開騷已經係3年前，呢到啲Fans都好熱情，又會有好多內地Fans嚟。（到時開騷會試吓經港珠澳大橋？）都可以試吓，咁就有多個渠道。」

妹妹想再獻Sing

講到上次麥花臣處男騷有邀請妹妹Natalie做嘉賓上台合唱，問到今次都會邀請？Kelvin話如果夾到時間都可以，更抵死笑指有朋友話妹妹唱得比他好聽：「又有啲問我佢係咪做歌手，好彩妹妹上到台都唔驚。（妹妹會唔會想再做嘉賓？）一定會想嘅。」不過他指希望某啲環節可以跟香港站有所不同，故正進行民意調查，了解Fans想聽咩歌：「估唔到有啲粉絲會想聽12年前第一隻碟嘅歌，有啲係我冇Live演出過，所以今次會有特別安排重新編曲。」續笑言發現Fans比較鍾意聽慘情歌，鍾意他「失戀」做獨行俠。

唔認拍拖

對於近期時不時有緋聞傳出，問到Kelvin可會邀請「緋聞女友」到場支持？他打趣話對全部緋聞都一笑置之：「覺得好搞笑，最近嗰單係話我攬住『嫩版陳茵媺』，其實係識嘅Fans。我入咗行十幾年，都明㗎啦！呢啲新聞…」又坦言之前睇到類似的報道會嬲，覺得點解要寫到自己咁樣，同朋友出去食飯都寫到偷情咁，好似逼到自己要做「天煞孤星」，但現時心態有所轉變，就覺的是笑料一則。

擇偶最緊要夾

不過他又透露媽媽亦想他快啲有另一半，而自己都準備好接受一段新戀情。問到如果有Fans追求，是否都會接受？他搞笑先話以前每個女友都是自己的Fans，後認真指主要睇感覺，現時不再「外貌協會」，會多多留意對方的內涵：「夾得嚟係好重要。（即係之前你夾唔到人？）係啩…我都唔知喎，自己唔會話自己夾唔到人㗎！」

----------------------------

東網巨星開咗ig喇，大家快啲follow啦！

https://bit.ly/2JjSVcr