大S自揭懷孕血淚史　身形暴脹自嘲似海狗

台灣女星徐熙媛（大S）一向對自己身材好有要求，最近接受訪問時，就自揭懷孕血淚史！大S以前一直努力希望可以維持喺42公斤（約92.4磅），但2010年同老公汪小菲結婚後，為咗改變不易受孕嘅體質，打破食素十幾年嘅習慣，開始食肉，但結果胃口愈嚟愈大，自嘲肥到好似一隻「海狗」：「確實挺驚訝，到後來快生的時候，已經躺沙發都起不來了，你想想是甚麼勁頭那是！」搞到老公都嚇親，但嗰時大S完全唔擔心，以為可以同以前一樣想瘦就瘦，點知生完第一胎佢徹底崩潰，因為體重仍然同產前一樣係72公斤（約158磅）！

而汪小菲又透露老婆佗第一胎時，只有一次成功逼佢出門，但「慘況」被影低，大S就話：「看吧，就是不要出門，（我像）海狗一樣。」所以生完都足不出戶，拒絕所有商演。汪小菲又話好懷念8年前喺北京認識佢嘅時候「很漂亮，瘦瘦的，無憂無慮」嘅女人，佢最苦惱並唔係老婆身材不復當年勇，而係因為呢個原因可以唔出街！

如今生完兩個小孩嘅大S，對於體重已逐漸看淡，以前沖完涼會睇勻全身，Check吓邊度需要多啲肌同少啲肉等等，依家沖完會立即着衫同唔照鏡。雖然有3個磅重機，但佢坦言好耐都冇磅過！