新婚唔恨度蜜月　黃德斌被老婆踢去開工

藝人黃德斌今早隨環保團體一行人出發到長洲，參與沙灘清潔活動，他表示平時行山都會幫手執垃圾，沿途都會見到好多膠樽、食物盒，問到之後會孖住老婆Joyce參與環保活動？德斌指夾到時間都會一齊做，希望自己做一個帶頭作用：「出到幾多力就幾多，喺屋企我會做垃圾分類，係會複雜啲，有時覺得政府係要配合，我住嗰度成條街得兩個環保箱，又好細，成日都會見到啲垃圾成地都係，應該做大啲。」

德斌透露現時正拍攝兩套電台劇集，題材分別是關注老人及癌症問題，將會拍到11月，而12月就會開拍電影，問到是否快開拍之前主演電影的第二集？他笑話劇本都未有咁快寫好：「之前宣傳期話會開拍，導演都講過幾次，但再拍就未必係講爬龍舟，原班人拍新故事，都會期待。」問到啱啱先新婚就咁多工作，唔怕老婆詐型？德斌打趣話唔會，仲踢晒腳笑話：「佢話『你快啲出去做嘢呀，如果唔係點養我呀？』。（幾時度蜜月？）遲啲先啦！佢都話唔急，你哋咁急做咩？（女人口不對心呀！）係咪呀？又踢我出去做嘢，又拉番我話去Honey Moon，多謝你哋提醒，哈哈！」