《全民》十強戰　釗峰受指示要幫佢拉票！

組合C AllStar成員釗峰現身ViuTV選秀節目《Good Night Show全民造星》的決賽場地，與十強齊齊進行拜神儀式，希望明日演出順利。擔任表演嘉賓的他表示會與眾參賽者合唱《月亮不代表我的心》：「知道Eric Kwok（郭偉亮）係導師之一，所以就揀呢首佢作畀我嘅歌唱，同佢哋打吓氣。」續指覺得十強既幸福又犀利，因他與C AllStar其餘3名成員都是由一個歌唱比賽出身，但當時的規劃、注意力都不比是次比賽：「希望佢哋之後有好嘅發展，同埋珍惜同隊友之間嘅感情，可能會搞一隊全民做AllStar呢！」

狄以達要求「出口術」

講到其中一名參加者Lokman是狄以達的好友，釗峰大爆受對方指示於表演期間「出口術」：「叫我記住講34（Lokman之代表號碼），幫手拉票，一路唱一路34。（會唔會一上台就嗌34？）又唔會咁癲，暗地裏滲喺歌詞度。（你都睇好佢？）當然會睇臨場表現，但如果有份投，友情牌都係畀佢，睇過佢之前啲Drama，佢表現力豐富、又跳得。」他又大讚十強的心理質素維持得好好，五個月來都好畀心機準備。

兄弟身高冇夾過

釗峰笑話如果今次有份參加比賽必定唔夠大家鍊，更以「奇特」來形容當年參加的比賽：「三位兄弟都同我差唔多身高，真係唔係夾，（高度）同佢哋直情比下去，除咗Fat boy（十強之一肥仔）同我一樣高，但佢隻眼又大過我，跳舞又勁，所以都係去番我嗰個時代好啲。」

----------------------------

東網巨星開咗ig喇，大家快啲follow啦！

https://bit.ly/2JjSVcr