醫生男友控制欲強！唔畀馮盈盈搽唇膏

由前港姐麥明詩同馮盈盈（FYY）主持嘅無綫節目《#後生仔傾吓偈》一向都好受觀眾歡迎，兩位港姐作風夠好出位，玩得又talk得。今次話題講扮靚，嘉賓Kose攞咗隻紫黑色嘅唇膏出嚟搽，搞到成隻疆屍咁，盈盈即自爆男友唔鍾意佢搽唇膏：「啲男仔唔欣賞女人搽唇膏，最起碼我男友唔鍾意，我一搽佢就話『做乜搽唇膏，搽到個嘴咁紅，一啲都唔自然。』咁我本身嘴冇乜血色，唔搽唇膏好似癌症病人。」而大家都覺得女士搽唇膏冇問題，麥明詩指住盈盈話：「呢個係你寶寶有問題。」有人認同，盈盈即指住電視機畀說話男友聽：「我都話你有問題。」

之後，陸浩明轉話題，現場放咗唔少衫，要即場幫麥明詩同另一位嘉賓波波嚟個造型大改變，麥明詩隨即去換衫，轉咗個形象出場，着上米色白色T恤工人褲加Boots，被讚可愛，盈盈指住佢話：「好似落雨雨水渠塞咗要去泵嘅感覺。」麥明詩亦好配合即通渠佬上身，做通渠嘅動作，十分搞笑，陸浩明話：「唔係通渠佬係通渠婆，本來對佢造型都冇寄予厚望，但佢都carry到，似牛奶妹風。」麥明詩自信滿滿指有用心去演繹：「我有啲detail位，好似摺起咗褲腳，又用夾夾咗個腰位，有番條腰出嚟。」而另一個改造嘅波波一出場嚇咗大家一跳，十足大媽一樣，連佢自己都頂唔順話冇得救，好核突！

唔少網民睇完條片都覺得好好笑，大讚兩個港姐好真好玩得！

ＸＸＸ：盈盈男友鍾意佢天然美，咁先最靚！

ＸＸＸ：麥明詩將通渠佬演繹成牛奶妹，出嚟效果好正！

ＸＸＸ：好鐘意盈盈做節目，好真！

KennＸＸ LeＸＸ：梗係投訴啦，因為佢bf鍾意無添加嘅盈女神嘛！

KＸ WoＸＸ ：好嘢！對睇電視有番興趣！