處女黨嫁得好！李亞男收逾億豪宅最爆

隨住苟芸慧成為人妻後，「處女黨」「升呢」變為「索爆人妻團」，仲要老公們對佢哋如珠如寶，認真羨慕死人！

李亞男

作為最早成為人妻嘅李亞男，婚後生活美滿，老公王祖藍喺2015年以1.14億元購入大埔豪宅「逸瓏灣」頂層連私人泳池嘅3,000呎複式單位做愛巢，祖藍仲將物業歸李亞男名下。今年，亞男宣布懷有身孕，佗住王家小公主。

鍾嘉欣

同脊醫Jeremy育有一子一女嘅鍾嘉欣，現時喺溫哥華過住少奶奶生活。雖然當日結婚Jeremy面對傳媒好怕醜，但對嘉欣真係無微不至，除咗去年為佢安排33歲驚喜生日派對外，今年四月鍾嘉欣仲佗緊第二胎話成日好攰同想嘔，Jeremy除咗返工之外，仲做埋煮飯公、家務公同埋湊仔公，用行動去表達對佢嘅愛！

王君馨

去年做人妻嘅王君馨，於美國下嫁拍拖11年嘅Daniel，而本身喺美國有自己事業嘅Daniel，為咗老婆放棄晒喺美國嘅一切，轉嚟香港發展，落地生根搵工重新開始。

岑麗香

岑麗香（香香）於2016年年底下嫁圈外老公強強，而強強亦都為香香放低喺溫哥華事業，嚟香港重新發展。強強除一早送香香出門口拍劇外，有時又做「跟得老公」同佢出活動同埋拍外景，好鬼貼心。