Avril Lavigne重生復出　自爆曾歷生死邊緣

唔少「80後」都聽住加拿大女歌手Avril Lavigne嘅名曲包括《Complicated》以及《My Happy Ending》成長，不過風靡一時嘅佢因病休養多時，闊別樂壇5年近期終於復出，34歲嘅佢日前以孖辮Look登上《Billboard》雜誌封面，令唔少粉絲大為驚喜！

近年因病及失婚困擾嘅Avril於訪問中大方剖白心路歷程，2014年巡唱期間感覺身體疲憊不堪嘅佢，被朋友發現疑似患上萊姆病，最後獲對抗過同一疾病嘅Gigi Hadid媽媽Yolanda介紹專科醫生，講到抗病經過，Avril爆粗表示：「我瞓X咗兩年病床！」當中要服用多種抗生素以殺死引起疾病嘅螺旋體，抗病時間長令佢叫苦連天。

Avril亦憶起有一晚與媽媽入睡時感到難以呼吸，開始祈禱並接受瀕死的時刻：「我感覺我好似遇溺咁，我嘗試上水呼吸空氣！」事件最後成為佢上月推出新歌《Head Above Water》嘅靈感。而佢於訪問中亦講到與前夫Chad Kroeger再合作感覺好好，自言所有經歷令到佢現時學會活在當下，唔會再好似機器咁，錄音室與巡唱兩邊走：「呢個係我自15歲後，第一次休息。」