畀馮盈盈教壞？6號送前衞手信要打格仔

前港姐馮盈盈向來出名作風大膽，不時都發表激爆言論而成為熱話。唔知係咪呢個大膽形象太深入民心，就連朋友送手信畀佢，都專登揀返啲意識前衞嘅禮物，認真知佢心意！近日佢喺《#後生仔傾吓偈》嘅拍檔陸浩明（6號）去完希臘旅行，就分別送咗兩個石像雕塑小擺設畀佢，而佢都好識做，立即影相放上社交網同大家開心share！

本來送雕塑擺設都好正常，一個係裸女，另一個擺設竟然刻住性動作，搞到盈盈都留言表示：「另一份手信就係咁...」睇嚟喺節目入面最正經嘅6號都已經學壞咗啦！