佢又嚟喇!Kim Kardashian再影半裸封面相

20181020
東網電視
更多新聞短片
Kim又影震撼封面!
美國真人騷女星Kim Kardashian一向都唔太鍾意着衫,最愛於社交網晒露肉照騷魔鬼身材,而佢4年前更為《Paper》雜誌拍下超火辣半裸露籮封面,一如佢所言「震撼互聯網」,至於佢近日再次重施故技,為《Richardson》雜誌20周年號拍下新封面,今次唔出「股惑」,但半裸正面腿張開Chok甫,驕人上圍與一身曲線任睇唔嬲,同樣尺度大開,令人咋舌,雖然Kim已經不時晒「波地」,但新封面仍引起網民熱議!
至於Kim的訪問內容都好「赤裸」,講到與前名媛老友Paris Hilton都分別流出過春宮帶,不過佢比Paris更紅,佢就話件事對Paris都有正面影響,就話自己接受生活中發生嘅所有事,包括春宮帶外流、於巴黎被劫,甚爸爸離世一事:「我只係從來都無受害者心態,呢樣唔係我嘅個性,我一直好似勝利者咁,(信自己)可以捱得過,唔會被呢啲事件定義我。」
另外,佢講到大家都可以平衡「性感女神」同「媽媽」身份時,言詞更加大膽,向記者表示:「我認為你都可以,我係個懷孕時重咗六、七十磅嘅女人,唔鍾意自己而且感覺好唔性感,去到最後就係連做愛都唔可以,當時我諗我以後都無法再同人發生性關係,覺得自己好差,網民又笑緊我,將我同鯨魚比較!」佢話後來用上八個月收身成功,感覺前所未有咁好,影全裸相更令佢感到獲得力量。但佢就話形象幾性感都好,現實生活中講性愛就會好唔自在,個人比形象保守咁話,相信睇雜誌封面真係睇唔出!
至於Kim近日亦於社交網分享佢為自家化妝品拍攝嘅廣告照,同樣有半裸上陣,更瞓埋身留影,又搵埋全裸男模合作,場面火辣辣!